Recomendacións para os runners na volta á actividade deportiva.

O CONSELLO MUNICIPAL DE DEPORTES DE OURENSE (CMD) ACHEGA UNHAS RECOMENDACIÓNS PARA OS RUNNERS NA VOLTA Á ACTIVIDADE DEPORTIVA.

1.  As dúas ou tres primeiras sesións o tempo é o de menos.

Non saias con obxectivos de rendemento nas primeiras sesións. Unha primeira semana de acondicionamento é fundamental para evitar lesións por sobreesforzo.

Mantén a cabeza fría e colle o punto á respiración, aos apoios sobre o terreo, etc., deixando ao carón as ganas de gastar zapatilla.

 

2.  Non te poñas retos de ritmos nin distancias.

Nas túas primeiras sesións ve só co obxectivo de gozar da carreira. Non forces cos ritmos que che poidan provocar unha sobrecarga muscular e déixenche en dique seco uns días. Só trota e goza do momento do que tantas ganas tiñas.

 

3.   Superficies lisas e homoxéneas.

Os espazos de práctica durante o confinamento, excepto os residentes en leiras, foron superficies lisas homoxéneas. Cando salgamos, atoparémonos beirarrúas, subidas, baixadas, fochancas e buracos. Nestes primeiros días mellor buscar a práctica en superficies lisas, ou o máis regulares posibles.

 

4.   Non vexas o que fai o resto de corredores.

Seguir nas RRSS aos nosos compañeiros de adestramentos habituais lévanos ás veces a relativizar o esforzo. Debemos ser conscientes do noso estado físico despois deste tempo de confinamento, polo que debemos, nestes primeiros días, escoitar ao noso corpo máis que nunca.

 

5.  Distanciamento social. Nunca a rebufo.

A distancia recomendada polos expertos entre 1,5 e 2 metros en estático, amplíase a 4 metros se imos camiñando detrás dunha persoa e ata 10 metros correndo. Tédeo moi en conta á hora de ir a rebufo doutras persoas.

6.  Novos tempos, novos hábitos.

Nestes días escoitamos que a forma de practicar deporte cambiará profundamente no futuro. Saquemos partido a este período de cambio e introduzamos, si non o facíamos antes, na nosa rutina de práctica exercicios hixiénicos. Empregar 10 minutos da sesión para quentar, 15 minutos para estirar na volta á calma, e outros 10 para uns exercicios de core (abdominais) ou forza funcional, non só  nos  farán  mellorar  no  noso  deporte  se  non  que  mellorarán  o  noso  benestar  e  os  nosos rendementos futuros.